Paralimpiyaçılarımızdan Avropa Gənclər Paralimpiya Oyunlarında daha 2 qızıl və 4 bürünc medal qazanıb

Türkiyənin İstanbul şəhərində davam edən Avropa Gənclər Paralimpiya Oyunlarının üçüncü yarış günündə parataekvondoçularımızın hər üçü fəxri kürsüyə yüksəlib.

Resorting.az xəbər verir ki, Amin Əliyev (K44, 63 kq) mübarizəyə yarımfinaldan start verib. İdmançımız yarımfinalda türkiyəli, finalda isə ispaniyalı rəqibini məğlub edərək qızıl medal qazanıb.

Amin Şıxalıyev (K44, 63 kq) və İmran Bağırov (K44, 70 kq) isə bürünc medala yiyələnib.

14 yaşlı uzunluğa tullanma üzrə pataatletimiz Ayşə Arabova (T11) 3.47 metr nəticə ilə iştirak etdiyi ilk beynəlxalq turnirdə qalib olub.

Paracüdoçumuz Hüseyn İsmayılzadə (J2, 70 kq) dairəvi formatda keçirilən yarışda türkiyəli və britaniyalı rəqiblərini məğlub edərək oyunlarının bürünc medalını qazanıb.

16 yaşlı paraüzgüçümüz Əli Vəliyev 100 metr məsafəyə sərbəst üzmə üsulunda qarışıq kateqoriyalar üzrə 1:02.15 nəticə ilə yeniyetmələr arasında (2009-2010) bürünc medal əldə edib.

Qeyd edək ki, Milli Paralimpiya komandamız dünən Avropa Gənclər Paralimpiya Oyunlarında 2 qızıl və 2 bürünc medal qazanmışdı.