Aralıq dənizinin sirli guşəsi Fəthiyə

Resorting.Az xəbər verir ki, son illərdə Ümumdünya Turizm Təşkilatı (UNWTO) da Türkiyənin turizm sahəsində apardığı ardıcıl islahatlar və infrastruktur inkişafını yüksək qiymətləndirir.

Xüsusilə COVID-19 pandemiyasından sonra Türkiyə sürətlə toparlanaraq yenidən turizm liderləri sırasında yer almağa başladı. Bunun əsas səbəbləri arasında turistlər üçün yaradılan təhlükəsiz şərait, xidmət səviyyəsinin artması, tarixi-mədəni abidələrin bərpası və əlverişli qiymət siyasəti ön plandadır.

Bu yazımızda isə Türkiyənin turizm xəritəsində xüsusi yeri olan, həm qədim tarixi, həm də təbii gözəllikləri ilə seçilən Fəthiyə bölgəsini daha ətraflı araşdıracağıq.

Fəthiyə bölgəsi Türkiyənin cənub-qərbində, Aralıq dənizi bölgəsində, Muğla əyalətinə bağlı bir rayondur. Ümumi sahəsi 3059 km² olan bu rayon, Muğla əyalətinin ərazi baxımından ən böyük bölgəsidir. Şərqdə və cənub-şərqdə Antalyanın Korkuteli və Elmalı rayonları, cənub-qərbdə Aralıq dənizi, qərbdə Qapıdağ yarımadası, şimalda isə Dənizli və Burdur əyalətləri ilə həmsərhəddir.

Bölgənin təbiəti dağlar, meşəliklər, yaylalar və dəniz sahilləri ilə zəngindir. Xüsusilə məşhur Ölüdəniz sahilləri dünyanın ən təmiz və sakit sulardan biri kimi tanınır.

Fəthiyənin tarixi qədim Telmessos şəhərinə dayanır. Əldə olunan məlumatlara görə, şəhərin əsası e.ə. V əsrdə qoyulub. İlk dövrlərdə Əhəmənilər İmperiyası, daha sonra isə Delos birliyi, Likiyalılar, Farslar, Makedoniyalılar, Selevkilər, Lagoslar, Roma, Bizans, Səlcuqlular, Menteşeoğulları və nəhayət Osmanlı imperiyası bu torpaqlar üzərində hökmranlıq etmişdir.
Şəhərin adı ilə bağlı məşhur əfsanəyə görə, Finikiya kralı Agenorun qızına vurulan Tanrı Apollon köpək cildinə girərək ona yaxınlaşır və bu birliyin nəticəsində Telmessos adlı oğul dünyaya gəlir. Apollon oğlunun şərəfinə qurduğu şəhərə Telmessos adını verir. Bu əfsanə Telmessosun qədim dövrdə mədəni və dini mərkəz olduğunu da göstərir.

VIII əsrdə şəhər Bizans imperatoru II Anastasinin şərəfinə Anatasiapolis adlandırılır. 1261-ci ildə Rum Səlcuqlu dövlətinin süqutundan sonra bölgə Menteşeoğulları bəyliyinin əlinə keçir. 1424-cü ildə isə Osmanlılar bu torpaqları öz ərazilərinə qatırlar və şəhərin adı Meğri olaraq dəyişdirilir (Rum dilində “uzaq diyar”).

1914-cü ildə Türkiyənin ilk hərbi pilotlarından olan Fəthi bəyin şəhid olması ilə əlaqədar şəhərin adı Fəthiyə olaraq dəyişdirilir. Bu gün bu ad həm şəhərin tarixi qəhrəmanlıq simvoluna çevrilib, həm də milli yaddaşda dərin iz buraxıb.

Fəthiyənin simvollarından biri olan Amitas məzarı, şəhəri əhatə edən təpələrin birində yerləşir. Bu monumental məzar IV əsrdə Telmessosun kralı Amitasın şərəfinə tikilmişdir. Yaxınlıqda yerləşən Telmessos amfiteatrı isə Roma dövrünə aiddir və 5000 nəfərlik tutuma malikdir. Bizans dövründə bu amfiteatr arena kimi istifadə olunmuşdur.

Fəthiyədə yerləşən qala qalıqları Əziz John Cəngavərləri tərəfindən inşa olunmuş, daha sonra XV əsrdə Rodos cəngavərləri tərəfindən bərpa edilmişdir. Qala şəhərin müdafiəsi ilə yanaşı, həm də dini və hərbi mərkəz funksiyası daşıyırdı.